TUKANG ENDOG

Naskah Drama Monolog pikeun Bahan Pangajaran Basa Sunda Kelas IX 

(TUKANG ENDOG KEUR NGAREUREUH HANDAPEUN  TANGKAL KAI BARI NGAGEBERAN AWAKNA KU DUDUKUY.  ENDOGNA DUA TOLOMBONG, LOBA KÉNÉH NU CAN PAYU. TENG LAMUNANANANA PANJANG, NGOMONG SORANGAN)

Lah, kieu rasana jadi jalma sangsara. Saban poé ripuh kudu nananggung endog ka mana-mana. Leuheung mun payu. Lamun henteu? Nya ngan ukur meunang kacapé. Awak asa raremuk satulang sandi, deuh....!

 (NGAHULENG DEUI)

Tapi jelema mah apan kudu sabar. Saha nu  nyaho isuk pagéto mah urang meunang milik gedé. Enya urang rék sabar baé, ah. Gusti Alloh bakal nyaaheun ka jalma nu sabar mah.

(RIUKNA UJUG-UJUG GUMBIRA BANGUN MEUNANG KABUNGAH)

Saha nu nyaho, isukan mah endiog urang payu dua tolombong. Ku urang moal dibeulikeun kana endog deui, tapi rék dibeulikeun kana hayam bibit. Engké hayamna diurus, bakal anakan, reuay ngalobaan, ngaratuuuus...!

Engké lamun hayamna geus loba, ku urang rék dijual kabéh, urang rék meuli domba. Heueuh, rék diurus sing tulatééén.... ngarah téréh anakan, ngalobaan.

 

(JEN NANGTUNG BARI TUTUNJUK)

Tuh tingali...! domba urang geus reuay baranahan, di pasir di tegalan urang sorangan anu ngangonan. Huuuh... nu bikang, nu jalu. Nu bodas, nu belang. Ieu domba urang rék dijual kabéh. Ladangna rék dibeulikeun kana sapi.

 

(SEURI NGABARAKATAK BARI TUTUNJUK DEUI)

Ha... ha... ha.... tingali urang ayeuna geus boga sapi! Wah, geus kaitung beughar boga sapi mah. Sapi urang baranahan, loba anakna. Sapi urang téréh garedé da alus rawat. Adeuh... lalintuh da hadé parab. Tah déngékeun disadana ogé emoh...emoh...emoh..., cenah. Ku urang mun geus loba rék dijual. Ladangna rék dibeulikeun kana mobil. Moal asa-asa, Lamborghini! Deuleukeun Lamborghini! Lamborghini Gallardo pulas hideung Batman, sakalian Lamborghini Super SUV! Mobil Raffi Ahmad léwaaat...!

 

(GÉK DIUK, LEUNGEUNNA PEPETA  CETAAN NYETIR MOBIL)

Deuh..., urang si ganteng nyetiran Lamborghini. Gigireun si rancunit tanding Miléa. Ikbal Dilan? Tai kuku!  Rék opatan sakaligus sugan nu jiga Jennie Blackpink? Hayu...!

Lah Aay... tong ngoconan waé atuh, apan Akang keur nyetiran.... Tuh... hah...! Budak meuntas. Waduuh...!  Tenang, urang nu ganteng tapis nyetiran. Budak meuntas ngadadak mah biasa!

(SUKUNA NÉJÉH SAKALIGUS, CETAAN NGERÉM, NGAJEJEK ENDOG DINA TOLOMBONG. ATUH TOLOMBONG TIGULING, ENDOGNA PRA-PRÉ PAREUPEUS. TUKANG ENDOG REUWAS. SADAR TINA LAMUNAN. TULUY NGOMONG BARI CEURIK)

Emh, endog urang peupeus satolombong! Endog urang pareupeus! Hu hu hu (CEURIK GAGAURAN) endog urang pareupeus...! Satolombong... satolombong...!

(TERUS CEURIK BARI MULUNGAN ENDOG)

(Diropéa tina Mahér Basa Sunda Kelas IX)